एजेन्सी। उत्तर कोरियाली नेता किम जोन उनलाई कोभिड १९ विरुद्धको खोप लगाइएको अमेरिकी एक विज्ञले बताएका छन् ।
उत्तर कोरिया मामिलामा जानकार अमेरिकी विज्ञ ह्यारी काजियानिसले एक लेख लेख्दै यसबारे खुलासा गरेका हुन् । उनका अनुसार चीन सरकारले किम र उनको परिवारलाई कोभिड १९ विरुद्धको प्रयोगात्मक खोप लगाएको हो ।
ह्यारीले जापानी गुप्तचर स्रोतको हवाला दिँदै यस्तो दावी गरेका हुन् । तर कुन कम्पनीले विकास गरेको खोप उनलाई दिइयो भन्नेबारे खुलाएका छैनन् । ह्यारीका अनुसार किम सहित उत्तर कोरियाली उच्च अधिकारीहरुलाई पनि पछिल्लो ३ हप्ताको अन्तरमा खोप दिइएको छ ।
उत्तर कोरियाले हालसम्म आफ्नो देशमा कोरोना संक्रमण नदेखिएको दावी गर्दैआएको छ । उसले कोभिड रोकथामका लागि नै चीनसँगको सीमा समेत पूर्ण रुपमा बन्द गरेको थियो । साथै यसबाट बच्ने अरु उपाय पनि अवलम्वन गर्दैआएको थियो । यद्यपि कोभिड विरुद्ध सावधान र शतर्क रहनुपर्ने आदेश किमले सत्तारुढ कम्युनिस्ट पार्टीको बैठकमा दिएका थिए ।
उत्तर कोरियामा कोभिडका संक्रमित नभएको कुरालाई दक्षिण कोरियाले पनि त्यस्तो सम्भावना हुनसक्ने प्रतिक्रिया दिएको छ । चीनसँग उत्तर कोरियाको घनिष्ठ सम्बन्ध भएकाले पनि यस्तो सम्भावनालाई दक्षिणले स्वीकार गरेको जनाएको छ । अमेरिकाले उत्तरलाई बारम्बार दबाब दिइरहँदा चीनले भने साथ दिँदैआएको छ ।